Tuesday, February 20, 2007

أول ما شوفتك ابتديت أحلم معاك!



ساعات لما بكون عصبية و زعلانة منك من غير سبب واضح , بيكون السبب إني مفتقداك و كنت مستنية إنك تسأل و ما سألتش ؛ و أنا مش قادرة أقول لك كده!



بخاف قوي ربنا يرزقني بأطفال يعملوا فيَ زي ما بعمل في ماما , بس نفسي يحبوني نص ما بحبها .



لأ مش " مو مهم إِوْعِد و إخْلِف , ما أعاتب و أنت تعرف ؛ لو جرحت القلب مرة , عادي خلِي الجرح ينزف " علي رأي الفنانة القديرة نوال الزغبي.



سامحني يا رب لأني لم أستطع أن أتقن صلاتي لك عندما كنت أصلي بمسجد أشبه بالسوق . كان عليَ أن أصب انتباهي علي الدفاع عن رأسي التي خشيت عليها كلما سجدت من ركلات المارة . كان أقرب إلي أن أؤجل كل الصلوات عندما أعود للبيت و لكني لم أفعل ذلك . كنت أذهب إلي المسجد أحمل عبءً فوق صدري و أصلي سريعاً و أخرج أحمد الله أنني لم أمت بالإختناق من الروائح المتنوعة بالداخل (كانت هتبقي موتة سيئة جداً! )- أعتقد انه لا داعي لذكر أنواعها!




إحساس جميل و أنت بتفك السلُوفان من علي كتاب جديد لسه شاريه.




اشتريت كتب كتير و تصفحتها أول يومين و بعدين رتبتهم في المكتبة و كل شوية أروح ألقي نظرة عليهم و أحس إني سعيدة .. كأني بستمتع بملكيتهم شوية قبل ما أبدأ أقراهم بجد.




تخيل لو أن كل منا وُلد مصحوباً بكتالوج يفيد بكيفية التعامل معه بصفة خاصة , و خريطة الدروب التي سوف تؤول لها حياته . ألن تفقد الحياة إذن عنصر الإثارة الذي تحمله لنا بين طيات الصعوبات التي تواجهنا بها –الذي في حد ذاته هو سبب كافي لأن نمضي فيها!


Thursday, February 08, 2007

أي كلام 3





بحب ألعب مع الأطفال قوي و أغلس عليهم و أعمل عقلي أصغر من عقلهم لو حكم اللعب!



كل ما بحس إني عايزة أقول لك ...... أتكسف و أسكت!



لما أروح النادي أذاكر و أنا زهقانة و دماغي فيها 100 حاجة , بينسم علي قلبي روقان و كلام الأجداد و الجدَات اللي مش بحتاج أفتح وداني عشان أسمعه لأن صوتهم عالي بما يكفي إني أسمعه و أنا في بيتنا!



بسأل نفسي كتير : هو انا ممكن أحب أولادي –إن شاء الله- أكتر من حبي ل "باتشي" و "فلوك" ؟!



لما هناخد الأولاد يلعبوا في النادي و نقعد نتفرج عليهم , هنبقي لسه بنقول لبعض كلام حلو و لا هنبقي كبرنا علي الكلام ده؟!







أي كلام 2


كل كلام الأُمهات واحد .. الأم دي في يوم كانت بنت بتنتقد كلام أمها و خالتها و عمتها و مِرات عمها ؛ بس لما بقت أم بقت بتكرر نفس الكلام بشكل آلي جداً و تضحك علي نفسها جواها .



الدنيا شكلها حسب النظارة اللي انت لابسها!



ويلما رودولف – أسرع امرأة علي وجه الأرض – قال لها الأطباء أنها لن تستطيع السير ثانيةً و أمها قالت لها أنها سوف تستطيع ؛ فصدقت أمها .



لما بصحي الصبح أحس إنه يوم تقيل , بالليل بقول الحمد لله اليوم خلص!




A misty morning doesn’t always signify a cloudy day!




تماماً كنكهة أن تفاجأ بورقة مالية من فئة الخمسين في آخر الشهر كنت قد وضعتها في جيب الفكة عن طريق الخطأ , كذلك هي نكهة أن تفاجأ بأصدقاء في وقت الشدة لم تكن تراهم من قبل.




صُبَ الزيتُ علي الماءِ فعلا الزيتُ فوق الماءِ , فقال له الماء :" كيف تعلو عليَ و قد أنْبَتُ شجرتك ؟ أين الأدب؟ أين الحياء؟!"
فقال الزيت:" لقد خُلِقْت يا ماء رجراجاً تجري و تلعب بين الجداول و الأنهار ؛ أما أنا فعلي القهر و العصر صبرت .. أليس بالصبر تعلو الأشياء ؟!" (منقول)


أي كلام 1

  • ليه و أنا مش في إيدي قلم ألف فكرة و فكرة بتتزاحم جوه دماغي, و أول ما أمسك القلم كلهم يتبخروا؟!

  • عندما تضْطَر لدفع ثمن باهظ من أعصابك مقابل أنْ يدَعوك تصْنع ما هو صواب وِفْق أفكارك – المعقولة جداً – في وضح النهار – لأنه صواب ! – و ليس تحت عباءة الليل تهرباً من تعليقاتهم التي تعكر صفوك ؛ هذا هو الجحيم بعينه!

  • ليه في عز فرحتي دمعة بتخونني و تنزل ؟!

  • أجمل لعبة كنت بستمتع بيها و أنا طفلة لما كان بابا أو ماما يمسكوا إيدي – عشان ما أتوهش كالعادة – و أنا أرفع راسي لفوووووق و أتفرج علي السما و أفضل أتابع سحابة أو نجمة أشوفها هتيجي معايا و لا لأ!

  • لما جدتي خافت علي إيدي اللي بطلعها دايماً من شباك العربية قالت لي إن العسكري بيشوف اللي مطلعين ايديهم و بيقطعهالهم . بقيت بطلع صوابعي بس و أول ما أشوف عسكري قلبي يدق جامد , بس ما كنتش بادخل صوابعي من الشباك و لا هو جه و قطعهم ؛ و جدتي عمرها ما أخدت بالها إني بطلع صوابعي من الشباك!