حوار من وراء الشباك

كل مرة واحد منهم يقف قدام شباكي ألاقيني بشاور له لأ أو شكراً من غير حتي ما أبص له , وأبدأ أكلم نفسي.
أنا: أنا ليه مش ببص له؟
نفسي: علشان ما يشبطش و يفضل واقف و يصر إنك تديله حاجة أو تشتري منه عقد فل دبلان أو كيس مناديل مش عايزاه .
أنا: بس أنا كده كسفته و عاملته بتناكة.
نفسي: هو متعود علي كده.
أنا: إزاي متعود علي كده؟! أكيد كل مرة حد بيعامله كده في كل إشارة بيتجرح!
نفسي: .....
أنا: أنا مش عايزة أعاملهم كده.
نفسي: ما كل الناس بتعاملهم كده و هما أصلاً مش غلابة أوي كده.
أنا: مش كفاية إنهم واقفين طول النهار تحت الشمس دي اللي أنا في التكييف مش مستحملاها , و كل خمس دقايق يقعدوا دقيقة علي الرصيف يرتاحوا و يرجعوا يقوموا تاني يمشوا بين العربيات لما الإشارة تقف .
نفسي: خلاص ابقي افتحي الشباك و بصي لهم في وشهم و ابتسمي لهم و طبطبي عليهم و قولي لهم ميرسي مش عايزة فل و لا مناديل و لا معطر للعربية.. و ابقي قابليني لو عرفتي تقفلي الشباك تاني و لا تمشي أصلاً من الإشارة!
أنا: !!

النور

ليس "دودى" عين العالم
التي فتحها الله
بطرف اصبعه
إلي السماء
فرمشت من النور..
"دودى"
النور..

شاعر جميل

حاجات بتسعدني

0 لما أصحي باليل و أبص في الساعة ألاقي لسه في وقت أنامه قبل ميعاد صحياني.
0 لما أرجع من برَه , أفتح باب البيت وألاقي باتشي جاي بيجري عليَ .
0 لما موبايلي يرن رنتك.
0 لما أكون في مكتبة فيها كتب كتير عاجباني.
0 لما أسمع أغنية بالصدفة كنت بسمعها زمان و تفكرني بذكريات.
0 لما أطلَع لِعبي القديمة ألعب بيهم.
0 لما يجيلي من غير مقدمات نوبة "هيبارا" أحس فيها إني علي طبيعتي خالص من غير أي تكليف.
0 لما أشوف فيلم في السينما أخرج منه راضية عن قصة الفيلم و أداء الممثلين و التصوير و الإخراج و المؤثرات الصوتية و المرئية و .......
0 لما أوصل لآخر صفحة في رواية عاجباني و تأثر فيَ ؛ أقرب مرة حصل فبها الكلام ده كان بعد ما خلصت رواية السيميائي لباولو كويلو.
0 لما أكتب حاجة تعجبني.
0 لما أقف علي البحر أغنِي-غالباً أغنية لفيروز- بصوت عالي و ماحدش سامعني.
0 لما أسوق مسافة طويلة لوحدي بمزاجي علي سبيل الفُسحة ؛ بحس إن ده بيغسلني من جوه.
0 لما تيجي علي الراديو ساعتها أغاني بحبها.
0 لما ألبس حذاء بكعب عالي و أعرف أمشي به بخفة و أنا مرتاحة.
0 لما أفكر قبل ما أنام إني هصحي الصبح أشوفك.
0 لما فجأة اكتشف إنك غيَرت فيَ حاجات للأحسن ؛ و لما أحس إني فاهماك من غير ما تتكلم.
0 لما ألعب مع قططتي و لما أخدهم في حضني و يبوسوني .. أيوة بيبوسوا زي الأطفال.
0 لما باتشي ينام جنبي علي المكتب و أنا بذاكر.
0 لما أخرج أفطر برَه و أشرب القهوة معاك في كافيه شيك.
0 لما أحضر حفلة حلوة في ساقية الصاوي أو الأوبرا.
0 لما أتغلب علي كسوفي و أقول لك كلام عايزة أقوله.
0 لما تاخد رأيي في حاجة و تعمله و يثبت إنه صح.
0 لما أعمل برأيك في حاجة .. طبعاً رأيك دايماً بيطلع صح! :)) (مش تريقة)
0 لما ألبس حاجة جديدة و تقول لي إنها حلوة.
0 لما تاخد بالك إني حاطة في عيني كحل أخضر. : )
0 لما حد من أصحابي القدام يكلمني في التليفون و أقول يااااااااااااااااااااااااااه!
0 لما ماما بتبقي رايقة.. ساعتها الدنيا بترقص.
0 لما أخرج مع أختي و نهيس في نفس الوقت.
0 لما حد يقول لي إني شبه جدتي (أنَه) والدة ماما.
0 لما في يوم الجو يكون جميل في عز الصيف.
0 لما أسمع فيروز.
0 لما أسمع أغاني معينة لنجاة الصغيرة خصوصاً أغنية ليها اكتشفتها قريب اسمها "لا تنتقد".
0 لما أتمشي علي النيل ؛ بس بحب البحر أكتر.