Friday, June 01, 2007

حاجات بتسعدني






0 لما أصحي باليل و أبص في الساعة ألاقي لسه في وقت أنامه قبل ميعاد صحياني.
0 لما أرجع من برَه , أفتح باب البيت وألاقي باتشي جاي بيجري عليَ .
0 لما موبايلي يرن رنتك.
0 لما أكون في مكتبة فيها كتب كتير عاجباني.
0 لما أسمع أغنية بالصدفة كنت بسمعها زمان و تفكرني بذكريات.
0 لما أطلَع لِعبي القديمة ألعب بيهم.
0 لما يجيلي من غير مقدمات نوبة "هيبارا" أحس فيها إني علي طبيعتي خالص من غير أي تكليف.
0 لما أشوف فيلم في السينما أخرج منه راضية عن قصة الفيلم و أداء الممثلين و التصوير و الإخراج و المؤثرات الصوتية و المرئية و .......
0 لما أوصل لآخر صفحة في رواية عاجباني و تأثر فيَ ؛ أقرب مرة حصل فبها الكلام ده كان بعد ما خلصت رواية السيميائي لباولو كويلو.
0 لما أكتب حاجة تعجبني.
0 لما أقف علي البحر أغنِي-غالباً أغنية لفيروز- بصوت عالي و ماحدش سامعني.
0 لما أسوق مسافة طويلة لوحدي بمزاجي علي سبيل الفُسحة ؛ بحس إن ده بيغسلني من جوه.
0 لما تيجي علي الراديو ساعتها أغاني بحبها.
0 لما ألبس حذاء بكعب عالي و أعرف أمشي به بخفة و أنا مرتاحة.
0 لما أفكر قبل ما أنام إني هصحي الصبح أشوفك.
0 لما فجأة اكتشف إنك غيَرت فيَ حاجات للأحسن ؛ و لما أحس إني فاهماك من غير ما تتكلم.
0 لما ألعب مع قططتي و لما أخدهم في حضني و يبوسوني .. أيوة بيبوسوا زي الأطفال.
0 لما باتشي ينام جنبي علي المكتب و أنا بذاكر.
0 لما أخرج أفطر برَه و أشرب القهوة معاك في كافيه شيك.
0 لما أحضر حفلة حلوة في ساقية الصاوي أو الأوبرا.
0 لما أتغلب علي كسوفي و أقول لك كلام عايزة أقوله.
0 لما تاخد رأيي في حاجة و تعمله و يثبت إنه صح.
0 لما أعمل برأيك في حاجة .. طبعاً رأيك دايماً بيطلع صح! :)) (مش تريقة)
0 لما ألبس حاجة جديدة و تقول لي إنها حلوة.
0 لما تاخد بالك إني حاطة في عيني كحل أخضر. : )
0 لما حد من أصحابي القدام يكلمني في التليفون و أقول يااااااااااااااااااااااااااه!
0 لما ماما بتبقي رايقة.. ساعتها الدنيا بترقص.
0 لما أخرج مع أختي و نهيس في نفس الوقت.
0 لما حد يقول لي إني شبه جدتي (أنَه) والدة ماما.
0 لما في يوم الجو يكون جميل في عز الصيف.
0 لما أسمع فيروز.
0 لما أسمع أغاني معينة لنجاة الصغيرة خصوصاً أغنية ليها اكتشفتها قريب اسمها "لا تنتقد".
0 لما أتمشي علي النيل ؛ بس بحب البحر أكتر.


5 comments:

Anonymous said...

بصراحه
بتابع المدونه من فتره للتانيه بس مش بعلق كتير
لكن بجد سطور بديعه جدا وعندي احساس بكل كلمه بتتقال والمعني جميل جدا
ربنا يسعدك

انتي عارفه انا مين؟

Anonymous said...

بصراحه
بتابع المدونه من فتره للتانيه بس مش بعلق كتير
لكن بجد سطور بديعه جدا وعندي احساس بكل كلمه بتتقال والمعني جميل جدا
ربنا يسعدك

انتي عارفه انا مين؟

Unknown said...

حلو قوي فكرة ان الواحد يعمل ليست يكتب فيها الحاجات اللي بتسعده في حياته
حلو قوي البوست
تحياتي

Stairway to Paradise said...

إزيك يا شيرين؟
طبعاً عارفة انتي مين..
شكراً علي ردك .. مش بتعلقي كتير ليه يا شيرين؟ علقي كتير :)
نورتيني بجد!



fanan fa2eer, شكراً علي ردِك..
مدونتك كمان لذيذة قوي .
تحياتي!

Anonymous said...

gameeeeeel awy
kalam simple bas ana 7asis enoh 7a2e2y awy
rabna yes3edkoh 3ala tol