الدنيا جميلة

مرة واحدة حسيت قد إيه الدنيا جميلة قوي . حتي الغلط فيها جميل لأنه من حقك تغلط . لما تعرف إن ربنا خلقنا بنغلط علشان نتأسف و نتوب يبقي الله علي ربنا !

لازم تعيش الدنيا بكل ما فيها من جد و هزار و فرح و ألم و غلط . حتي لو صحيت الصبح لقيت ناس قريبين عندهم مشاكل و ناس بتتخانق مع ناس .. أنا مش قلقانة علشان كده هم عايشين و غير كده الدنيا ما تتعاش.

حتي لما بزعل منك مابخافش علشان عارفة إنك هتيجي تصالحني و إني هانام و قلبي بيرقص و علشان أنا ما بزعلش منك بجد لأن أنت في علبة قطيفة جوه خزنة كبيرة (قطيفة برده) في حتة بعيدة جوه في قلبي و لا حتي أنت تقدر تقرب منها!

لما أصحي الصبح يوم الجمعة علي صوت ماما و أختي في الصالة عاملين الشاي و بيفطروا .. أقوم أبوسهم قبل ما أسرح شعري و نفطر سوا و نقعد نرغي ؛ أصلهم وحشوني قوي .. تبقي بجد الدنيا جميلة.

لما قبل ما أنام أقرا في كتابي اللي مستنيني علي مخدتي و ياخدني في دنيا تانية و أنام و أنا مبتسمة.

لما الشتا ييجي و المطرة تنزل تغسل القلوب و أحس بلسعة البرد في صوابعي و طرف مناخيري بس من جوايا الدفا طالع يدفي كل البردانين.
بحب في الشتا أشرب الميَه من التلاجة و أكل آيس كريم في الشارع و أخرج تحت المطرة . بعشق الشتا علشان فيه بحس إني أنا.

بعشق كمان ليل القاهرة علي النيل (في الشتا برده) و وشه بيلمع بنور المباني المعكوس عليه و الميَه رايحة جاية تجيبلي كلام و توديه . بعشقه علشان بيفكرني بيك!